Tabuk City – Aginnagaw ti sipnget ken lawag idi petsa June 8, 2006 idi agallangugan ti damag a pinatay dagiti masuspetsa a kameng ti death squad ti estado da Rafael “Markus” Bangit ken Gloria Casuga, maysa a mangisursuro iti Quezon, Isabela idiay Echague, Isabela.  Iti sumaruno a bulan iti daytoy met laeng a tawen, napasamak manen ti panang-ambush iti lugan ni Dr. Chandu Claver a sadino ket nakaro a nasugatan isuna ken ti anak da ken natay ni Alyce claver nga asawa na.

Makoy Alyce

Sakbay a mapapatay da Markus ken Alyce, naiyaramid ti nagduduma a krimen ken nadangkok a panaglabsing iti kalintegan tao kas iti nasaknap a panang-reyd ken saan a nainkalintegan a panangrakisa dagiti police kadagiti balbalay nga idadauluan ni Kalinga Provincial Director Pedro Ramos kadagiti barangay iti Tabuk kas  iti barangay Dilag, Lacnog, Nambaran , San Juan, Gobgob ken Tuga. Ditoy a napapatay da Amor ken Noel Gobiangan ken maysa nga ag-apilyedo ti Gallema. Amin dagitoy ket biktima ti Oplan Bantay Laya 1 and 2 ken ti Inter-Agency Legal Action Group (IALAG) ni presidente Gloria Macapagal Arroyo. Uray iti upland Kalinga iti daytoy a panawen  ket nakaro ti operasyon militar. Idi nagtugaw ni president Benigno Simeon Aquino III iti programa na nga usto a dalan wenno “daang matuwid” ngem kakibin daytoy Oplan Bayanihan ken ti ramen na a Peace and Development Team (PDT’s) a nakaro met laeng ti sinagrap ti umili a human rights violations ditoy probinsya.

Sangapulo a tawen ti naglabas ngem inggana ita ket awan hustisya.  Agtaltalinaed nga awan sungbat iti saludsod dagiti ubbing a naulila, kapamilya, kakabagian, ka-tribuan, gagayyem ken kakailian kabayatan nga agtultuloy dagiti Operation Plan a mangpakarkaro iti kasasaad dagiti mannalon. Aggibus ti Oplan Bayanihan ni Benigno Simeon Aquino III ita a tawen ngem napaay iti panggep na a mangkillo ken mangiyadayo iti  kaipapanan ti usto a Bayanihan gaputa naiduma iti kongkreto a biag dagiti umili ti Bayanihan militar. Ania  ngata manen ti sumaruno nga Operation Plan?

Iti pammati a ti pudno a hustisya ken waya-waya ket saan a madawat a kas tinapay nu di ket mailaban, alaen ti Justice and Peace Advocates for Kalinga (JPAK) ken Cordillera People’s Alliance – Kalinga a karit a mangpatibker iti ganuat na bayat a tantannawagan na ti pannakatameng ken pannangipaay iti naan-anay a hustisya kadagiti amin a Biktima ti EJK iti probinsya, rehiyon iti umadani a panagtugaw ni  nangabak a presidente Rodrigo Duterte  kas panangipa-simuda-ag iti ibagbaga na a kapia ken talna para iti pagilian a Pilipinas.

KALINGA JUSTICE AND PEACE ADVOCATES FOR KALINGA (JPAK)

June 8, 2016

 

Advertisements